Қўшнисининг калити қўлига тушган Шуҳратнинг фикри бирзумда ўзгариб, икки нафар танишига қўнғироқ қилади ва "ёғли" иш чиқиб қолганини айтади. У "дўст"ларига қўлидаги калитни кўрсатиб, хонадонга ўғирликка киришни режалаштиради.
Учовлон Раъно опанинг уйига кириб, целлофан пакет ичидаги 11 минг 205 АҚШ долларини олиб чиқиб кетишади. Шуҳрат "дўст"ларига 2 минг АҚШ долларидан бериб, қолганини ўзида олиб қолади. Ўғирланган пулларга энг қиммат уяли телефон, кийим-кечак сотиб олишади, таксилар, ресторанлар улар хизматида бўлади.
Бир ҳафтадан сўнг, ўғриларнинг чўнтагидаги долларлар камая бошлагач, қўшнисининг калити ҳамон қўлида эканлигидан фойдаланиб, яна ўғирликка киришади.
Энг қизиғи, хонадон эгаси Раъно опа ўғли Элёрдан қўшнининг ўғли Шуҳратдан уйнинг калитини олгани ёки олмаганлигини ҳам сўрамаган. Ўғли ўзининг ёнидаги калит билан уйига кириб-чиқиб юраверган. Она ҳатто ўғлида уйнинг калити борлигини ҳам билмаган. Бундан фойдаланган Шуҳрат "дўст"лари билан иккинчи марта ўғирликка киради. Бу гал ҳеч вақо тополмагач, ошхонадаги пичоқ билан ётоқхонадаги бир неча шкафларнинг қулфини бузади ва уйни қулфламай чиқиб кетади.
Ўша куни Раъно опа эшикка калит солмоқчи бўлганида, эшиги очилиб кетади. Уйга кирганида эса ичкаридаги шкафлар бузилганини кўради. Хаёлига бирдан қўшниси Шуҳрат келади. Уйнинг калити ўшанда қолган, деган фикр ёдига тушади.
Бу ҳақда у зудлик билан туман ички ишлар бўлимига хабар қилади. Гумонланувчи сифатида сўроқ қилинган Шуҳрат Отажонов ўз "дўст"лари билан Раъно опанинг уйига икки марта ўғирликка тушганини ва 11 минг 205 АҚШ доллари ўғирлаб, унинг анчагина қисмини ўз эҳтиёжлари учун ишлатиб юборганини тан олди.
Жиноий гуруҳ ўз қилмишлари учун қонун олдида жавоб берди.
Манба: “Инсон ва қонун” газетаси
Киракаш омон қолди, бироқ қиз қийноқлардан жон берди
Охирги бир неча кун ичида Чирчиқда ўта шафқатсизлиги билан ажралиб турувчи бир нечта жиноят қайд этилди, дея хабар беради аnhor.uz сайти.
Кеча, 6 ноябрь куни, соат бирлар атрофида ёши тахминан 18-20 ларда бўлган учта ёш йигит “Перекрёсток” деган жойда такси тўхтатиб, Чирчиқ шаҳригача олиб бориб қўйишни сўраган. Манзилга етиб келгандан сўнг орқада ўтирган йигитлардан бири кутилмаганда пичоқ олиб, ҳайдовчининг бўғзидан тортган. Бироқ ҳайдовчи машинадан сакраб тушишга, ерда ётган тошни олиб машинанинг олд ойнасига отишга муваффақ бўлган. Ҳайдовчи тошни шу даражада қаттиқ отганки, у олд ўриндиқда ўтирган жиноятчига теккан. Бундай қатъий қаршиликни кўрган жиноятчилар қочиб кетган. Ҳайдовчи эса қўли билан жароҳатини ёпганича, шаҳар касалхонасига етиб олган, ҳозир у реанимацияда ётибди.
Якшанба, 2 ноябрь куни эса бир нечта ёш йигит хонадонлардан бирига бостириб кириб, у ерда йигирма икки ёшли қизни қийнашган. Кейин пул ва қимматбаҳо буюмларни олиб, газ конфоркаларини очишган ва хонадонга ўт қўйиб қочиб кетишган. Бу пайтда қиз билан яшайдиган холаси дўконга чиқиб кетган. Уйга келган аёл эшик ва деразалардан чиқаётган тутунни кўрган, газ ҳидини ҳис қилган ва жиянини ўласи қилиб калтакланган ҳолатда топган. Қиз жароҳатлардан холасининг қўлида кўз юмди.
Айни пайтда ушбу жиноятлар бўйича тезкор-қидирув ишлари олиб борилмоқда.